食嘢除咗可以令人溫飽之外，其實仲可以帶來快樂， 除咗揀自己鍾意嘅嘢食之外， 其實有科學證實某啲食物係可以為人帶嚟愉快，興奮嘅感覺。 甚至有啲係有抗壓，降低焦慮同消除疲勞添～ 阿四借少少機會同大家介紹吓小部份嘅食物～
希望大家都能夠多吸收快樂因子，遠離煩惱～
除咗大家熟悉嘅安多酚之外， 其實食物裡面仲有多巴胺，血清素同埋催產素， 以上幾樣都係有助令人感到愉快同舒暢嘅食物，利用科學去幫助自己。
當然，正所謂均衡飲食，大家都要適可而止， 食完個人開心晒記得返嚟幫襯我呀～
🍊橙：**橙含有豐富嘅維生素C，而且仲有維他命B，同高抗氧化成份，有助身體產生多巴胺。
🍇紅提同黑提：**紅提同黑提含有豐富嘅花青素，花青素可以幫助身體產生血清素，有助提供幸福感，可以紓解心情，防止抑鬱。
🍫黑朱古力：**黑朱古力含有豐富嘅可可多酚，可可多酚可以幫助身體產生安多酚，令人產生興奮同愉快感，甚至有止痛嘅作用。
🥜🌰堅果：**堅果含有豐富嘅鎂，有助身體產生血清素，有助傳遞幸福嘅大腦訊息。 而且亦有研究堅果當中嘅硒，對人體情緒有正面嘅影響。
🍌香蕉：**香蕉含有豐富嘅鉀，幫助身體產生多巴胺，而且當中嘅澱粉質有助維持正面嘅情緒，亦都可以預防胃部過酸。
🍵抹茶：**抹茶含有豐富嘅茶氨酸，有研究除咗釋放更多多巴胺之外，亦都能降低壓力同埋焦慮。
芝麻：**芝麻可以話係神奇嘅食品，裏面除咗高蛋白質， 維他命E，鈣質，鎂，仲有維他命B6，可以幫助消除疲勞，提高抗壓性。 而其中裏面嘅色胺酸仲可以舒緩情緒，減少壓力同埋改善睡眠嘅質素。
如果少少嘅資料，可以幫助有需要嘅人， 阿四都會開心啲～
記得食晒上面嘅嘢之後返嚟搵我啦～
阿四